بقلم الشاعر /سامح عطيه
صباحكم_توليب
بوصل الحبيب
ويومكم يوم أبيض
بلون الحليب
صباحكم مميز وفعلا غريب
#صباحكم_توليب
،،،،،،،،،،،،،،،،،،،،،،،،،،،،،،،،،،،،،،،،،،
بدعوة لواحد مسافر بيتعب
بحلم البسيط انه يشقي ويكسب
بصبر اللي عايش ببكتب ويحسب
ورغم الصعوبة يحاول يجيب
#صباحكم_توليب
،،،،،،،،،،،،،،،،،،،،،،،،،،،،،،،،،،،،،،،،،،،،
بصوت ست صابرة تربي في ولادها
تكافح عشانهم و تصحي ف معادها
نجاحهم طموحها وعلامهم دا زادها
شريفة وعفيفة وهدفها يصيب
#صباحكم_توليب
،،،،،،،،،،،،،،،،،،،،،،،،،،،،،،،،،،،،،،،،،،،،
بنظرة لواحد آلامه تزيد
ملازم فراشه ودايما مريض
وعنده عزيمة وصابر اكيد
وشمس القناعة لا يمكن تغيب
#صباحكم_توليب
،،،،،،،،،،،،،،،،،،،،،،،،،،،،،،،،،،،،،،،،،،
بفرحة عروسة تكمل جهازها
وتحلم بلحظة زفافها وجوازها
سعيدة بخطيبها انه صمم وعازها
تشاور و تضحك تقول النصيب
#صباحكم_توليب
،،،،،،،،،،،،،،،،،،،،،،،،،،،،،،،،،،،،،،،،،،،،
بحكمة موظف مثالي وشريف
بيرفض رشاوي وعايش نضيف
برغم انه عاجز في تمن الرغيف
لكنه محافظ بمبدأ رهيب
#صباحكم_توليب
،،،،،،،،،،،،،،،،،،،،،،،،،،،،،،،،،،،،،،،،
بروح طفل نازل حديث الولادة
بيحلم بمصر اللي فيها االسعادة
وعاوزة شهادة وعاوز افادة
بأن التطور هيظهر قريب
#صباحكم_توليب