زوج مش بتاع كلام
كتب /سامح عطيه
زوج_مش_بتاع_كلام
وبرغم إن أنا راجل شاطر
لكن في جمالك شيء خايب
باسكن لك في البال والخاطر
والاقاني ف حضورك غايب
بأتوتر من نظرة عين
وأتلخبط زي التانين
لو شوفتك بس دقيقتين
النبض يزيد وبكون دايب
انا ساكت مش باعرف انطق
كان نفسي اكون فعلا أجرأ
من حرف رومانسي يدوب بأعرق
وسكوتي دا عاملي مصايب
أنا شايفك قلبك متألم
علشانك عاوزاني اتكلم
وندردش علطول ونسلم
ونهزر ونجيب في لعايب
طب اعمل ايه علشان ترضي؟
يا دفايا وهوايا وبردي
انا نفسي الدنيا تكون وردي
وانا وانتي عشاق وحبايب
نتصالح نتخاصم عادي
نتكلم عن حلو الماضي
لو نزعل علطول تتراضي
لو يحصل إيه أنا مش سايب
انا ممكن اكون عصبي شوية
او عندي ضغوطي النفسية
لكنك النور في عنيا
وانا قلبي كاللبن الرايب
في غيابك انسان متلخبط
وفأي مكان ماشي وبأخبط
كراسة وقلمها مشخبط
والسطر بيظهر متعايب
وانا كوني اساسا من كونك
ولذلك ساكن ف عيونك
وأحلفلك يوميا اصونك
واوهبلك من حبك نايب
متمسك جدا بوجودك
يتقلب يتغير مودك
أنا أصلا موصوفلي ردودك
والموقف صعب ومش هايب
نتخانق علطول يوميا
نزعل او نتعب نفسيا
أنا واثق جدا فعليا
إن إحنا عشاق وحبايب
شايلاني ومهمومة بهمي
وكأنك دمك من دمي
أو عيلتك من عيلة امي
أو كنا في الاصل قرايب
هتقولي دا واحد بيخرّف
اقسملك لازم هاتصرّف
واعملك في حاجات هتشرّف
وهافاجك دايما بعجايب
هاتغير م اليوم واتحول
وارجعلك احسن م الاول
نتكلم علطول ونطوّل
لو كنت غلطت خلاص تايب
أنا عاشق في العمر بحاله
لو يحصل في الكون ما بداله
أرسملك في شبابي نضاله
وأخلص لك علطول لو شايب !
